Завод за културу войводянских Руснацох
Консултативни конференциї за снованє Кровней орґанизациї младих Сербиї
Last Updated on Tuesday, 16 March 2010 19:54 Written by Administrator Tuesday, 16 March 2010 19:47
Завод за културу войводянских Руснацох поволує заинтересованих представительох руских младежских орґанизацийох же би ше уключели до консултативного процесу коло инициятиви за снованє Кровней орґанизациї младих Сербиї - КОMС.
Перша од седем предвидзених консултативних конференцийох отримана 4. марца у Беоґрадзе, на котрей участвовали представителє коло пейдзешат орґанизацийох цивилного дружтва. Циль консултацийох же би ше уключели представителє здруженьох так же би ше на основи їх думаньох порихтал материял за сновательну скупштину КОMС. Консултативни процес предлужує ше 25. марца у Новим Садзе, а 26. марца у Суботици.
Снованє КОMС требало би допринєсц розвою институциялних рамикох за участвованє младих у злєпшованю їх дружтвеного положеня. Консултациї буду тирвац по април, а вец би требала шлїдзиц сновательна скупштина. КОMС настал зоз Коалициї младих Сербиї 2009. року, а у консултативним процесу ма потримовку Министерства омладини и спорта Републики Сербиї и других институцийох.
Информациї о консултативних конференцийох находза ше на сайту www.koms.org.rs дзе ше находза и прияви за конференциї.
Beрификовани одлуки Управного одбору Заводу
Last Updated on Thursday, 11 March 2010 18:25 Written by Administrator Thursday, 11 March 2010 18:02
НОВЕ ОРАХОВО, 11. марец 2010. (Рутенпрес) - Трицец осма схадзка Националного совиту рускей националней заєднїци прешлей соботи, 6. марца, отримана у Новим Орахове.
На схадзки у Новим Орахове верификовани и одлуки з нєдавно отриманого Управного одбору Заводу за културу войводянских руснацох, хтори ше одноша на програмни и финансийни звити о роботи у прешлим, як и план роботи у тим року.
Представянє Руснацох на Салонє кнїжкох
Written by Administrator Tuesday, 09 March 2010 22:32
НОВИ САД, 9. марец 2010. (Рутенпрес) - На Салону кнїжкох, хтори ше од 4. по 9. марец отримує у Новим Садзе, вчера, 8. марца, були представени и нови виданя руских видавательних установох и руских писательох.
Нашо виданя на Салону кнїжкох у Новим Садзе участвую на штанду Покраїнского секретарията за културу, и вчера перше представена часц видавательней дїялносци новосадскей Новинско видавательней установи "Руске слово", а потим и дзепоєдних виданьох Завода за културу Войводини, односно Дружтва за руски язик, литературу и културу.
У програми представяня НВУ "Руске слово", акцент на Салонє кнїжкох дати на творчосц Михала Ковача, односно твор о Ковачови "Євангелиста Ковач" академика Юлияна Тамаша.
О творчосци и самей спомнутей Ковачовей кнїжки бешедовали сам автор др Юлиян Тамаш, и редакторе кнїжки Микола Шанта и Микола М. Цап, док нашо рецитаторе - Андрея Колєсар з Руского Керестура и Александер Мудри зоз Кули, пречитали вецей писнї Михала Ковача.
Представянє Ковачовей творчосци на Салону кнїжкох у Новим Садзе, НВУ "Руске слово" витворело у сотруднїцтве зоз Заводом за културу войводянских Руснацох.
У пополадньових годзинох, на истим штанду представени и виданя Заводу за културу Войводини, у рамикох хторого роби Координация дружтвох за язики, як и нашо дружтво за руски язик, литературу и културу.
Медзи другима, представени и Мултиязикови билтен "Мост", число 9, як заєднїцвки проєкт Координацийного одбору дружтвох за язики, а нашо Дружтво окреме представело вибор з поезиї Меланиї Павловичовей "Плави лет-Белави лєт", "Русини у Новом Орахову-Руснаци у Новим Орахове”, “Руске обисце” Олени Папуґовей, як и зборнїки роботох “Студия Рутеника”.
Ище пияток, 5. марца, другого дня отримованя Салона, представена и збирка сказкох по сербски нашей писательки Ирини Гарди Ковачевич - "Сказке", а у виданю Городскей библиотеки Нови Сад.
(конєц) зам